Sekretari i Përgjithshëm i Partisë Demokratike, Flamur Noka në seancën e sotme plenare akuzoi qeverinë se nuk po bën asgjë për të luftuar korrupsionin dhe krimin e organizuar. Kjo sipas tij, pasi qeveria ka ardhur në pushtet falë bashkëpunimit me bandat.
Më tej ai përmendi dhe një personazh të shumëpërfolur të botës së krimit, Nuredin Dumanit, duke thënë se “është i vetmi njeri që ka ndihmuar në luftën kundër krimit”.
Pjesë nga fjala e Nokës:
Po bëni gjithçka për të përdhosur flamurin. Qeveria juaj as një ditë nuk ka bërë betejë me krimin e organizuar. Unë e di këtë, por edhe shqiptarët e dinë. Ju erdhët në pushtet falë bashkëpunimit me krimin. Cfarë do të thotë ai flamur kur ti nuik mbush asnjë kriter për të ecur në rrugën drejt BE?
Lufta kundër krimit dhe korrupsionit çfarë është? Ju po tregoni se nuk keni asnjë ambicie për të ecur në këtë rrugë. Në fakt Shqipëria sot është në ditën më të zezë të saj, ka vetëm jë fajtor: Edi Rama dhe qeveria e tij, por edhe ky parlament që është shndërruar në një noter të akteve kriminale në këtë vend.
I vetmi njeri që ka ndihmuar në luftën kundër krimit është një kriminel, Nuredin Dumani, kjo është ironike. Policia nuk ka vullnet, nuk mund të luftoj ortakët e shefit dhe kryeministrit.
A mund të ecim në drejtim të BE, flamurin e të cilit ne jemi të nderuar që e kemi këtu, kur nuk luftojmë korrupsionin. Bashkëshorti i ministres shpallet investitor strategjik. Ta harrojë Rama dhe banda e tij se nuk do të jepet llogari për çdo abuzim me djersën, mundin e gjakun e shqiptarëve.
Në një moment kryetarja e Kuvendit, Lindita Nikolla i tha Nokës se është deputet i pavarur, pasi është përjashtuar nga grupet parlamentare, ndërsa Noka iu kthye duke thënë se është zgjedhur deputet nga demokratët që e kanë votuar dhe jo nga ”Ali Basha”.
Nikolla: Një sqarim: nuk shënohet i pavarur, por deputet jashtë grupeve parlamentare, u ka përjashtuar grupi dhe jo kryetarja e Kuvendit.
Flamur Noka: Demokratët më kanë zgjedhur si deputet të tyre, nuk më ka zgjedhur Ali Basha, jam deputet i PD, më thoni cili nen i kodit apo i kushtetutës i jep të drejtë shërbëtorit të Ramës të më përcaktojë se si jam unë. Nuk mund të ma caktojë askush për sa kohë nuk është e caktuar në Kushtetutë e në rregullore. Nxirreni aty e thoni se në cilën nen e ligj apo në këtë vendim se Flamur Noka nuk është deputet i PD, ju jeni thjesht spikere, ju duhet t’i referoheni ligjit e rregullores.
