Autoritetet franceze kanë ndërhyrë në një anije cisternë nafte, e njohur si pjesë e “flotës fantazmë” ruse, e cila dyshohet se është përfshirë në incidente me dronë në hapësirën ajrore të Danimarkës. Cisterna, me emrin “Pushpa” ose “Boracay”, ndodhej në brigjet e Saint-Nazaire dhe kishte ardhur nga porti Primorsk, pranë Shën Petersburgut, më 20 shtator.
Gjatë kontrolleve, dy persona, përfshirë kapitenin dhe zëvendësin e tij, u arrestuan. Presidenti francez Emmanuel Macron njoftoi se kjo flotë anonime, që përfaqëson një investim të madh për buxhetin rus, është përgjegjëse për financimin e 40% të përpjekjeve ushtarake të Rusisë, duke transportuar hidrokarbure pavarësisht sanksioneve perëndimore. Sipas Macron, janë rreth 600 deri në 1,000 anije që operojnë në këto kushte.
Cisterna kishte devijuar planin e saj, që do ta çonte në Indi, dhe mbeti e ankoruar disa ditë pranë Saint-Nazaire. Autoritetet dyshojnë lidhjen e saj me incidentet e fundit të dronëve në Danimarkë, që çuan në pezullimin e fluturimeve ajrore.
Prokurori i Brestit, Stéphane Kellenberger, njoftoi se hetimet në lidhje me arrestimet janë për shkak të “shkeljeve detare”, përfshirë mospërputhje në dokumentacion dhe mosbindje ndaj autoriteteve, veprime që mund të dënohen me deri në një vit burg dhe 150 mijë euro gjobë. Macron e përshkroi ndërhyrjen si një “operacion shumë të rëndësishëm”, duke theksuar veprimin e shpejtë të forcave franceze për shkak të gabimeve të ekuipazhit.
Origjina e dronëve që shkelën hapësirën ajrore daneze mbetet e paqartë, por autoritetet daneze kanë akuzuar Rusinë për përfshirje. Po ashtu, Rusia është dyshuar për incidente të ngjashme që ndodhën në Poloni dhe në hapësirën ajrore të Estonisë.
Kryeministrja daneze, Mette Frederiksen, kërkoi një “përgjigje të fortë ndaj luftës hibride të Rusisë”. Macron shtoi se “çdo shkelje e hapësirës ajrore evropiane do të ketë pasoja” dhe theksoi nevojën për avancim të sistemëve ushtarake dhe paralajmërimit të hershëm për dronët, duke e cilësuar situatën si një konfrontim të drejtpërdrejtë me një Rusi gjithnjë e më agresive.
