Ashtu si dhe ishte lajmëruar më herët, ka nisur protesta para Ministrisë së Brendshme ku kërkohet dorëheqja e ministrit Bledi Çuçi, pas vdekjes së 32 vjeçarit Leart Kurti në Komisariatin e Policisë.
Ndryshe nga dita e parë e protestës, ditën e sotme një numër më i madh qytetarësh janë grumbulluar para ambienteve të Ministrisë së Brendshme ku po kërkojnë drejtësi për vdekjen e të riut.
Qytetarët kanë hedhur domate, jo drejt uniformave blu, por në afërsi të këmbëve të tyre.
Protesta, nën sloganin “Drejtësi për Learin”, është mbështetur edhe nga kreu i Partisë Demokratike, Sali Berisha.
Ndërkohë, ditën e sotme për herë të parë foli nëna e Lear Kurtit, Fatmira Mustafa. Ajo ka ka hedhur akuza ndaj policisë duke thënë se kur ka parë trupin e pajetë të djalit ka vënë re se ai ka qenë i dhunuar dhe me hematoma në trup.
Nëna ka kërkuar që të dalë e vërteta dhe të hiqen njollat ndaj djalit të saj, ku është thënë se vdiq pasi gëlltiti 2 qese të vogla me kokainë dhe ndërroi jetë si pasojë e arrestit kardiak.
