TIRANË- Kryeministri Edi Rama ka folur sërish për punën e Strukturës së Posaçme kundër Korrupsinit dhe Krimit të Organizuar. Në një intervistë të dhënë për “Nacionale”, Rama tha se për të është gjithmonë një lajm i mirë nëse ka hetime dhe arresime, pasi për të do të thotë që është hequr një tjetër ‘e keqe’. I pyetur nëse, ndonjëherë, ndonjë prej personave të akuzuar prej SPAK-ut, ia ka thyer besimin, Rama e kishte një koment. Sipas tij, çdokush që kryen korrupsion, e bën të ndjejë neveri.
Madje u shpreh se çdokush që shkel ligjin, vetëdistancohet nga kreu i qeverisë, megjithatë shtoi se mesa duket edhe tradhëtia është pjesë e politikës.
PJESË NGA INTERVISTA:
Rama: Për mua është gjithmonë lajm i mirë kur një parazit nuk është më në një pozicion që të ushqehet me trupin e shtetit shqiptar. Është njësoj sikur ke një person të dashur dhe doktori thotë që ia hoqëm atë të keqe që kishte. Kemi një rast në Bashkinë e Tiranës. As nuk jam interesuar për detajet e “5D” është një çështje nën hetim. Përgjegjësia ime politike është shumë e qartë që ky vend të bëhet një vend që askush të mos jetë mbi ligjin dhe drejtësia të mos jetë në varësinë e pushtetit politik. Unë nuk dua të kujtohem për ndonjë gjë tjetër në këtë fushë përveçse për një gjë; që luftova që Shqipëria të ketë një moment kthese ku drejtësia të godasë majtas-djathtas.
Buzhala: A ka ndonjë person që ta ka thyer zemrën kur ka rezultuar se ka kryer korrupsion?
Rama: Shiko, unë e kam…në gjithë këto vite është e vështirë të ma thyesh zemrën. Futjen në zemër të njerëzve e kam pasur problem shumë kohë më parë. Por tani i kam bërë një blindim zemrës me eksperiencën dhe ato që kam hequr dhe më krijon neveri. Ndjehesh i neveritur. Ta kesh njeriun që të të vijë në zyrë, të punosh me të, e në fund të kuptosh që u mungon diçka të tjerëve. Neveri ndjej!
Buzhala: A është dikush që mundet të të përlyejë?
Rama: Unë nuk distancohem por kushdo që bën këtë gjë, vetëdistancohet. Është shumë e rëndë ta mendosh se është tradhëti, poshtërsi, por kjo është jeta. Historia e qeverisjes që nga dita që ka lindur polika se ky element i tradhëtarit që është aty në një rreth të ngushtë, e shoqëron historinë e politikës, nuk ke çfarë bën.
