Donald Trump deklaroi të dielën se ka një “shans të mirë” për arritjen e një marrëveshjeje për t’i dhënë fund luftës në Ukrainë, pas raundit të fundit të negociatave mes SHBA-së dhe delegacionit ukrainas në Florida. Komentet e tij vijnë ndërsa i dërguari i posaçëm amerikan, Steve Witkoff, përgatitet për udhëtimin në Moskë për bisedime të mëtejshme.
Diskutimet maratonë në Florida janë cilësuar si “produktive”, sipas palëve, megjithatë, sekretari amerikan i shtetit, Marco Rubio, theksoi se “duhet ende shumë punë” para se të arrihet një dakordësi, dhe një burim nga delegacioni ukrainas e përshkroi situatën si “jo të lehtë”.
Vizita e Witkoff-it në Moskë, e parashikuar për të martën, do të përfshijë takime me presidentin rus Vladimir Putin për të diskutuar hapat e mundshëm drejt një zgjidhjeje diplomatike. Trump, duke folur nga bordo i Air Force One, përmendi sfidat që përballet Kievi, përfshirë një hetim korrupsioni që çoi në shkarkimin e shefit të stafit dhe kryenegociatorit të presidentit Volodymyr Zelenskyy.
Ai u shpreh: “Ukraina ka disa probleme të vogla të vështira, por mendoj se ka shanse të mira që të arrijmë një marrëveshje.” Këto zhvillime vijnë në një moment delikat për Ukrainën, e cila vazhdon të përballet me tensione dhe sfida të brendshme.
