Partia Demokratike kërkon zyrtarisht shpalljen të pavlefshme të zgjedhjeve në qarkun e Korçës.
Kërkesa është depozituar në Komisionin e Ankimeve dhe Sanksioneve, duke kërkuar përsëritjen e zgjedhjeve në të gjithë qarkun.
Në dokumentin e dorëzuar në KAS parashtrohen edhe provat për masakrën zgjedhore në këtë qark.
Kështu, fillimisht përmendet përdorimi sistematik i administratës publike dhe strukturave shtetërore në funksion të interesave elektorale të PS.
Më pas përdorimi i kësaj administrate dhe strukturave publike për të ndikuar tek vota e diasporës.
Në dokument thuhet madje se i gjithë aparati shtetëror u angazhua për të siguruar vetëm 36 vota të burgut të grave në Pojskë. Si pasojë, rezultati ishte 100 përqind në favor të PS-së.
Në dokumentin e PD citohet edhe raporti paraprak i OSBE/ODIHR që theksonte se qarku i Korçës ishte ndër rajonet që shfaqi problematika serioze në këto zgjedhje.
Dokumenti i ndërkombëtarëve nënvizonte se në Korçë pati pretendime për blerje votash dhe përfshirje të strukturave të patronazhistëve për të bërë presion mbi qytetarët.
Më tej, në ankesën e PD thuhet se është dokumentuar me fakte konkrete shpërndarja e miellit për vota në zonën e Maliqit.
Po ashtu me raste konkrete përmenden favoret nga zyrtarët e partisë shtet për bizneset e zonave të ndryshme.
Asfalti elektoral dhe investimet para zgjedhjeve, të ndaluara me ligj, janë pjesë e kësaj dosje.
Në dokumentin e PD përmenden edhe punësimet e reja në administratë gjatë fushatës për blerje votash.
Një pjesë të rëndësishme në këtë dosje zë pjesa e manipulimit të votës së diasporës, duke nënvizuar se një e treta e të gjithë zarfeve të Greqisë erdhën në një ditë të vetme.
Farsa elektorale u finalizua në ditën e zgjedhjeve, thekson dokumenti voluminoz.
Kujtojmë se PD ka nisur të kërkojë pavlefshmërinë qark pas qarku pas masakrës zgjedhore të 11 Majit 2025.
