Sot Gjykata e Posaçme kundër Krimit të Organizuar dhe Korrupsioni dënoi me 3 vite shërbim prove gjykatësen Mimoza Margjeka, e cila u akuzua se kishte marrë 6 mijë Euro ryshfet për të liruar një person të arrestuar për transport emigrantësh.
Margjeka është dënuar edhe për 5 vite që të mos ushtrojë asnjë funksion publik. Burri i gjykatëses së Korçës, Arben Cara u dënua me 4 vite burg. Sipas akuzës, ky i fundit ishte personi që kishte marrë paratë për t’ia dhënë gruas së tij gjykatëse.
Pas daljes nga seanca gjyqësore, Mimoza Margjeka kishte akuza të forta. Ajo tha se pas vendimit qëndron vetë kryeministri Edi Rama dhe shtoi se në pushtet është mafia.
“Të shqetësosh lartmadhëninë (Rama) nuk paska lidhje? Po u shqetësua më i madhi, këta të tjerët janë miza me i shtyp me këmbë. Ju nuk po guxoni ta pyesni. Unë kam ik nga Durrësi nga krimi nga korrupsioni.
Nuk i besoj më institucioneve. Unë jam gjyqtare, unë e di ligjin. Këta njerëz janë të porositur, mua më vjen keq për ta. Nuk e kam me pasion të bëj sot gjyqtaren. Më dënua mua, nuk është fundi i botës, shyqyr që nuk është koha e Enverit se do t’i varnin” tha ajo.
Por për çfarë dosje bëhet fjalë që e lidh me kryeministrin?
Gjithçka daton në 2019. Zgjedhjet lokale që u bënë me vetëm një kandidat në shumicën e bashkive. Mes tyre edhe Durrësi, ku Valbona Sako ishte pa rival. Por i duhej vendimi i gjykatës për zgjedhjet.
Partia Socialiste iu drejtua Gjykatës së Durrësit për t’i dhënë vërtetimin e mandatit të Sakos, por Margjeka e refuzoi duke mos i cilësuar të rregullta zgjedhjet. Dy ditë më pas, me firmë të kryeministrit, PS bëri një tjetër kërkesë që u pranua, por Margjeka flet për një inatë të vjetër dhe hakmarrje.
Dosja e korrupsionit
Orjon Bali u fut në “valle” për 200 euro, por përfundoi duke dhënë 6 mijë ryshfet për të dalë nga qelia, ndërsa mori edhe të tjerët me vete në një fund të hidhur. Kjo është historia e trafikantit të emigrantëve Orjon Bali që shënoi skandalin e korrupsionit në gjykatën e Apelit në Korçë, ku e përfshirë është gjyqtarja Mimoza Margjeka.
Orjon Bali u kap duke transportuar 5 emigrantë palestinezë nga Korça në Tiranë kundrejt 200 eurove. “Rreth orës 13.00 u nisa nga qyteti i Tiranës për në qytetin e Korçës për të marrë persona të huaj dhe për t’i çuar në qytetin e Tiranës kundrejt përfitimit prej 200 eurove” tha ai.
I vëllai, Nejton Bali që u dënua 2 vite e 4 muaj shërbim prove u vendos në lëvizje për ta nxjerrë nga qelia. Ai u lidh me avokatin Skënder Demiraj i dënuar 3 vjet shërbim prove dhe sekserin Klaudio Zhilla i dënuar me 3 vjet burg. Personat e lartëpërmendur i dorëzuan shumën 6 mijë euro burrit të gjyqtares Arben Cara që u dënua me 4 vite burg.
Pjesë nga dosja
Arben Cara që ishte nën vëzhgimin e SPAK-ut në një moment takohet me gruan gjyqtare, Mimoza Margjeka dhe pas 4 minutash ajo futet në gjykatë. Në krahun tjetër, kur numërimi mbrapsht për seancën vijonte, Nejton Bali flet me nënën dhe i thotë se ka arritur 99%.
“6 mijë euro ua thashë atyre ta nxirrnin sot, 5 mln duhet lekë garanci pasurore, kur të mbarojë çështja i tërheqim mbrapsht”. Por ku do i gjejnë lekët për garancinë pasurore.
Djali i thotë nënës se “Do i paguajnë lekët miqtë e Skënderit (avokatit) dhe nesër duhet të çojmë paratë ose mund të vijnë ti marrin në Tiranë.
Skënderi më tha se me 99% e kam mbaruar këtë punë. Më tha se nëse e hanë në llaf gjyqtarët do të kenë punë me atë, pasi i ka dhënë lekët që mbrëmë”. Por ku do i gjejnë lekët avokati? Në përgjime rezulton se ai ia kërkon Klaudjo Zhillës, i cili përgjigjet “Patjetër”.
Më pas Klaudjo Zhilla flet më të atin, Albertin, të cilit i thotë se “Skënderi do një pesçe”, ndërsa e pyet “se mos bën ndonjë karagjozllëk”. Por Albert Zhilla siguron djalin “Jepi pa merak”. Skema u zbulua nga SPAK.
