Ryan Lochte, ish notari amerikan dhe rekordmen botëror, tani përballet me vështirësi ekonomike pas divorcit nga bashkëshortja e tij, Kayla Reid, me të cilën ka tre fëmijë. Në moshën 41-vjeçare, Lochte është i detyruar të nxjerrë në ankand tri nga gjashtë medaljet e tij të arta olimpike. Çmimi total i këtyre medaljeve arrin vlerën prej 385,520 dollarësh, rreth 400 mijë euro.
Lajmi është bërë publik nga Darren Rovell, një gazetar i mediave digjitale CLLCT. Kjo nuk është hera e parë që Lochte shkon në treg për të shitur trofetë e tij. Në vitin 2022, ai kishte nxjerrë në shitje medalje të argjendta dhe bronzta për një vlerë prej 166 mijë dollarësh. Tani, ai ka vendosur të shtojë edhe tre medalje të arta në koleksionin e tij për të ndihmuar gjendjen e tij financiare.
Mes medaljeve të ofruara janë: ajo e fituar në stafetën 4×200 metra stil i lirë në Lojërat Olimpike të Pekinit 2008, për 183 mijë dollarë; medalja e artë nga stafetë 4×200 metra në Athinë 2004, që shpallet me një çmim prej 80 mijë dollarësh; dhe medalja e artë nga stafetë 4×200 stil i lirë në Lojërat Olimpike të Rio de Janeiro 2016, për 122 mijë dollarë.
Lochte, i njohur për arritjet e tij në not, ka pasur një karrierë të suksesshme, duke rivalizuar legjendat e sportit si Michael Phelps. Megjithatë, situata e tij aktuale tregon dhe një anë tjetër të jetës së ish-yllit të notit, duke hedhur dritë mbi ndikimin e ndarjeve personale dhe problemeve financiare në jetën e atletëve pas përfundimit të karrierës profesionale.
