Tirana do të festojë sërish Ditën e Verës, me aktivitete festive që fillojnë më 13 mars dhe do të zgjaten deri në orët e para të 15 marsit. Bashkia e Tiranës njofton se devijimi i trafikut do të nisë prej orës 12:00 të 13 marsit, duke u shtrirë deri në orën 02:00 të 15 marsit, për të garantuar qetësinë dhe sigurinë e festimeve.
Për të mundësuar zhvillimin e aktiviteteve për të gjitha grupmoshat, Bashkia në bashkëpunim me Policinë e Shtetit ka përgatitur një plan të detajuar për kufizimin e qarkullimit të automjeteve në disa segmente rrugore. Kështu, nga ora 22:00 e 13 marsit deri në orën 18:00 të 14 marsit, do të bllokohen disa pjesë të Bulevardit “Dëshmorët e Kombit” dhe rrugëve përreth.
Kufizimet do të prekin segmentet rrugore nga Ministria e Brendshme deri në kryqëzimin me rrugën “Gjergj Filipi”, si dhe disa rrugë të tjera për të siguruar hapësira për festimet. Më pas, do të ketë masa edhe për rrugën “Dëshmorët e 4 Shkurtit” dhe rrugën “Pjetër Bogdani” në periudhën nga 13 mars ora 12:00 deri në 15 mars ora 02:00.
Një aspekt i rëndësishëm i këtij plani është se qarkullimi i mjeteve të emergjencës dhe Policisë do të bëhet sipas një rruge të paracaktuar, duke përfshirë disa rrugë të tjera si “Lek Dukagjini”, “Abdyl Frashëri” dhe “Papa Gjon Pali II”.
Gjithashtu, linjat urbane të transportit publik do të kenë deviacione, duke kaluar në sheshin “Willson” dhe bulevardin “Zogu I”. Këto masa janë ndërmarrë për të siguruar një festë pa probleme dhe për të lehtësuar lëvizjen e qytetarëve në ditët e festimeve.
Bashkia e Tiranës e inkurajon qytetarët të shijojnë këtë ditë të veçantë dhe të respektojnë masat e vendosura për të gjithë.
