Xhudistja kosovare, Distria Krasniqi ka shkëlqyer sot në Grand Slamin e Parisit.
Krasniqi ka arritur ta fitojë medaljen e artë në kategorinë deri në 52 kilogramë në xhudo.
Në finale ajo e mundi xhudisten hungareze, Reka Pupp duke e dominuar atë nga fillimi deri në fund.
Ajo pati një performancë të mirë që në fillim të kompeticionit.
Krasniqi e kaloi pa luftë raundin e parë kurse në të dytin e mundi spanjollen, Marina Castello Diez.
Në çerekfinale kampionia olimpike mundi mongolezen, Sosorbaram Lkhagvasuren
Në gjysmëfinale, Krasniqi ishte më e mirë se francezja Amandine Buchard.
Përveç, Distria Krasniqit sot garuan edhe Flaka Loxha dhe Laura Fazliu, por që nuk shkuan më shumë se deri në raundin e tretë.
Nesër do të garojë edhe Loriana Kuka, që e mbyll garimin e ekipit kosovar në këtë Grand Slam.
