Pamje dramatike dhune janë parë këtë të hënë në ishullin e Kretës, ku protestat e fermerëve grekë janë përshkallëzuar me intensitet. Turma të mëdha protestuesish u përplasën me forcat policore në afërsi të aeroporteve të Haniasë dhe Iraklios, duke shkaktuar trazira që po zgjatjnë prej javësh.
Në Hania, tensionet kulmuan kur fermerët thyen kordonin policor, përmbysën një automjet të policisë dhe detyruan njësitë speciale të tërhiqeshin, pavarësisht përdorimit të gazit lotsjellës. Situata ishte gjithashtu e ngjashme në Iraklion, ku disa protestues arritën të depërtojnë në pistën e aeroportit, duke shkaktuar mbylljen e tij përkohësisht.
Protestat e ditës së sotme janë pjesë e një lëvizjeje të gjerë që e ka filluar prej fund-nëntorit, me fermerët që kërkojnë përshpejtimin e subvencioneve të Bashkimit Evropian dhe uljen e kostove të prodhimit. Akuzat për shpërndarje të padrejtë të ndihmave financiare për individë të lidhur me pushtetin kanë intensifikuar protestat.
Në veri të Greqisë, bllokadat vazhdojnë, veçanërisht në doganën e Promahonas me Bullgarinë dhe në autostradën Egnatia pranë Kozanit. Rrugët kryesore janë të bllokuara nga qindra traktorë, ndërsa në disa zona protestat kanë degjeneruar në përplasje me policinë.
Kryeministri Kyriakos Mitsotakis u ka bërë thirrje fermerëve të ulin tonet e protestave, duke premtuar se pagesat e subvencioneve dhe masat mbështetëse do të kryhen brenda dhjetorit. Megjithatë, protestuesit kanë paralajmëruar se do të ashpërsojnë aksionet nëse kërkesat e tyre nuk përmbushen menjëherë.
Situata mbetet e tensionuar në shumë zona të vendit, dhe autoritetet greke pritet që protestat të intensifikohen më tej, në një nga mobilizimet më serioze të fermerëve në vitet e fundit.
