Deputetja e Partisë Demokratike, Sorina Koti, ka publikuar letrën e plotë të ish-drejtoreshës së mbledhjes së Detyrimeve Tatimore, Shilda Kamberi Hasanaj, të dërguar drejt Komisionit Parlamentar të Ligjeve, ku i kërkonte ngritjen e një komisioni hetimor për drejtorin e përgjithshëm të Tatimeve, Ceno Klosin, për abuzimet e kryera nga ky i fundit në drejtorinë që ai drejton.
Përmes një postimi në “Facebook”, Koti deklaron se qeveria detyron nënpunësit civilë që të zbatojnë urdhra politike, duke duke shtuar se denoncimi është i plotë me emra dhe me fakte.
“Dhuna e drejtuesve politike ndaj administrates publike…Kjo eshte fytyra e shtetit, qe detyron nenpunesin civil te zbatoje urdhra politike…. Kjo eshte fytyra e arrogances, qe nuk njeh kufij njerezore…
Denoncim i hapur dhe i plote ndaj Drejtorit te Pergjithshem te Tatimeve, duke dhene emra dhe fakte!
Drejtesia duhet te beje punen e vet! Kjo arrogance, ky abuzim me qytetaret dhe nenpunesit civile duhet te marre fund!”, shkruan Koti.
Ndërkohë, në letrën dërguar Komisionit, Shilda Kamberi Hasanaj e cila ka punuar për 23 vite te Tatimet dhe më pas është pushuar nga puna, ka kërkuar ngritjen e një komisioni hetimor për drejtorin e përgjithshëm të Tatimeve, Ceno Klosin, për abuzimet e kryera nga ky i fundit në drejtorinë që ai drejton.
Hasanaj ka dhënë fakte se si Ceno Klosi dhe drejtorët pranë tij i bëjnë presion psikologjik dhe i kërcënojnë punonjësit e administratës me “bukën e fëmijëve në varësi” për të kryer veprime në kundërshtim me ligjin.
