TIRANË- Gjykata e Posaçme ka shtyrë për në 2 korrik, seancën në ngarkim të ish-kryebashkiakut të Himarës, Jorgo Goros, ku do të jepet dhe pretenca ndaj tij. Prokurori Elvin Gokaj ka thënë në seancë, se kanë përgatitur konkluzimet me 75 faqe por ka kërkuar më shumë kohë për të përfshirë në fashikuj pretendimet e mbrojtjes në seancën e fundit.
Ish-kryebashkiaku i Himarës, Jorgo Goro, u arrestua për shpërdorim detyre, kryer në bashkëpunim në lidhje me tjetërsimin e një sipërfaqeje toke, që gjendet në fshatin Gjilekë të Dhërmiut, të cilën Gjykata e Posaçme e ka nën sekuestro. Këto sipërfaqe prej rreth 10 mijë metra katror janë sekuestruar nga SPAK dhe si përfitues fundor kishin ish-deputetin Artan Gaçi.
Goro u arrestua në mars të vitit të kaluar, pas kallëzimit te depozituar nga Fredi Beleri. Për të njëjtën çështje, do të gjykohet edhe ish-kreu i Kadastrës së Vlorës, Bilbil Aliaj, i cili ndodhet në masën e sigurisë ‘detyrim paraqitje’ si dhe ish-juristi Vezir Gjikoka që ka masën ‘arrest në shtëpi’.
