TIRANË- Nëna e Melisa Trëndafilit, e cila prej disa ditësh ndodhet në spital pasi bashkëshorti tentoi ta digjte të gjallë. Ana Sino ka shprehur shqetësimin e saj për mungesën e mbrojtjes nga policia, ndërsa dhëndri i saj është ende në kërkim.
Sino tha se ajo dhe fëmijët e saj jetojnë në frikë të vazhdueshme për shkak të mundësisë që ngjarja tragjike të përsëritet. “Normale që kam frikë. Unë kam marrë me vete fëmijët se për sa kohë ai e bëri këtë, mund të bëjë edhe të tjera. Po shikon ndonjë polic të më mbrojë mua? Kujdesi i spitalit është i veçantë, vajzës i bëhet kujdes special, e falenderoj, por nga ana tjetër nuk ka një polic. Unë nuk kam ndonjë kujdes nga shteti,” tha Sino për Euronews.
Nëna e Melisës kërkoi që policia të marrë masa të menjëhershme për kapjen e dhëndrit të saj dhe të garantojë sigurinë e familjes së saj. Sino shprehu zemërimin e saj të thellë, duke thënë se nëse do ta gjente vetë, do e digjte njësoj si ai i dogji vajzën. “Unë po e gjeta do i bëj të njëjtën gjë që i bëri vajzës sime. Po ta di ku është do ta them ty? Vete e vras vetë unë,” deklaroi ajo.
