Vija bregdetare e ishullit Hormuz në Iran ka marrë një pamje të jashtëzakonshme, duke u shndërruar në një peizazh që ngjan me planetin Mars, pasi deti ka marrë një ngjyrë të kuqe të thellë. Këto imazhe kanë bërë xhiron e botës, duke tërhequr vëmendjen e publikut global.
Sipas ish-drejtorit të Shërbimit Meteorologjik Helenik, Theodore Kolidas, ky fenomen, ndonëse vizualisht i mahnitshëm, nuk është asgjë misterioze. Ai e shpjegon si një mekanizëm gjeologjik dhe hidrometeorologjik. Ishulli i Hormuzit, i njohur si “Ishulli i Ylberit”, ka toka të pasura me okside hekuri, veçanërisht hematit. Gjatë periudhave me reshje intensive, ky material të imët larë nga shpatet e ishullit transportohet në det, duke i dhënë ujit ngjyrën karakteristike të kuqe.
Fenomenet e tilla meteorologjike lidhen me reshje të rralla, por intensive, në një rajon që zakonisht është i thatë. Kolidas shpjegon se toka e thatë favorizon rrjedhjen e shpejtë sipërfaqësore, duke rritur transportin e sedimenteve. Ai e karakterizon këtë si një shembull klasik se si ngjarjet ekstreme hidrologjike mund të nxjerrin në pah identitetin gjeologjik të një vendi shumë shpejt.
Pamjet e detit të kuq nuk lidhen me ndotje mjedisore, por janë rezultat i një procesi natyror, që është vërejtur edhe në të kaluarën. Kolidas nënvizon se ky fenomen bëhet veçanërisht spektakolar pas reshjeve intensive. Një fenomen i ngjashëm është regjistruar edhe në vende të tjera me toka të pasura me hekur ose argjilë, kur këto materiale kombinohen me reshje të dendura.
Ngjyrat e kuqe të detit pranë Hormuzit kanë krijuar pamje tërheqëse dhe kanë bërë jehonë në media të ndryshme, duke e bërë këtë fenomen një temë diskuti jo vetëm në Iran, por në tërë botën. Raste të tilla shfaqin pasuritë gjeologjike të një zone dhe rolin e klimës në formimin e saj.
