Një ngjarje tragjike ka tronditur Italinë jugore, ku një grua 25-vjeçare është arrestuar në Reggio Calabria, e akuzuar për vrasjen e dy fëmijëve të saj binjakë menjëherë pas lindjes. Ngjarja ka ndodhur në korrik 2024, ndërsa hetimet përkatëse përfunduan së fundmi.
Sipas hetimeve, 25-vjeçarja ka mbytur foshnjat dhe më pas ka fshehur trupat e tyre brenda një dollapi, të mbështjellë me një batanije. Tragjedia është zbuluar nga nëna e të arrestuarës, e cila kishte ndjerë një erë të rëndë që ndjesej në dhomën e saj.
Prokuroria është e mendimit se i fejuari i gruas, për të cilin dyshohet se është baba i fëmijëve, ka qenë një bashkëpunëtor në këtë akt të tmerrshëm. Dyshimet janë forcuar nga një sërë mesazhesh të shkëmbyera mes çiftit, në të cilat diskutoheshin fëmijët dhe mënyra se si do t’i fshihnin. Tashmë, ai po akuzohet gjithashtu për vrasje.
Më tej, hetuesit janë të shqetësuar për mundësinë e një krimi tjetër, pasi dyshohet se çifti ka vrarë edhe një foshnjë të tretë në vitin 2022. Kjo foshnjë, mendohet të jetë varrosur në tokën e familjes së vajzës, dhe policia po vazhdon kërkimet për ta gjetur trupin.
E reja kishte qenë shtruar në një spital në Reggio Calabria për shkak të gjakderdhjes së rëndë, vetëm disa ditë para se nëna e saj të zbulojë trupat e binjakëve në shtëpi. Ajo kishte mohuar të ketë qenë ndonjëherë shtatzënë apo të ketë lindur.
Sistemi hetimor është angazhuar për të zbardhur rrethanat e kësaj ngjarjeje për të cilën opinioni publik është tronditur thellësisht. Autoritetet italiane po punojnë për të plotësuar këtë tablo tragjike dhe për të nxjerrë në pah detaje të tjera të lidhura me këtë rast të pazakontë.
