TIRANA– Detaje të reja kanë dalë në dritë rreth arrestimit të vëllezërve Deni dhe Kejni Selimllari, konkretisht të moshave 21 dhe 18 vjeç. Mësohet se dy të rinjtë ndodheshin në një nga lokalet e natës në zonën e njohur të Bllokut në kryeqytet, në gjendje të dehur. Sipas rapotimeve ata kishin filluar të bërtisnin dhe të shkaktonin rrëmujë brenda lokalit, duke shqetësuar klientët dhe stafin.
Kanë qenë kamarierët të cilët janë detyruar t’i nxjerrin jashtë për shkak të sjelljes së tyre të papërshtatshme. Por as kjo nuk ka mjaftuar që vëllezërit Selimllari të qetësohen, edhe pasi janë nxjerrë jashtë, situata u tensionua edhe më shumë. Djemtë kanë vijuar të bëjnë zhurmë, britma dhe ofendime ndaj të tjerëve në rrugë.
Mësohet se në ato momente është afruar një punonjës policie që u përpoq t’i qetësonte por pa asnjë rezultat, pasi është përballur me sjellje të dhunshme nga të rinjtë.
E si të mos mjaftonte kjo, dy të rinjtë, gjatë shoqërimit në Komisariatin nr.2 në Tiranë, kanë thyer kamerat e sigurisë dhe derën e dhomës në të cilën ndodheshin. Gjithashtu bëhet me dije se vëllezërit kanë kërcënuar një tjetër efektiv që ndodhej në ambientet e Komisariatit.
