TIRANË- Erion Alibej do të dilte sërish sot para trupës gjykuese të GJKKO për të dhënë dëshminë e tij në kuadër të dosjes “Plumbi i artë”. Por seanca e sotme ka dështuar për shkak të mungesës së disa avokatëve. Prandaj seanca është shtyrë për në datën 17 qershor, ora 10:00, për shkak të mungesës së disa avokatëve mbrojtës. Në vijim të kërkesës së Prokurorisë së Posaçme, gjykata ka vendosur të pezullojë afatet e paraburgimit për të gjithë të pandehurit në këtë çështje, deri në zhvillimin e seancës së radhës.
Alibej akuzohet si kreu i një prej grupeve kriminale më të njohura në Elbasan dhe ndodhet në hetim për trafik ndërkombëtar droge dhe porositje atentatesh për motive hakmarrjeje. Në dëshminë e dhënë deri tani para trupës gjykuese, ai foli për përfshirjen e tij në rrjetet e trafikut të kokainës, si dhe për lidhjet me eksponentë të botës së krimit.
Gjithashtu ai ka përmendur përplasjet me vëllezërit Franc dhe Hajdar Çopja, si dhe me Suel Çelën, me të cilët më herët kishte pasur marrëdhënie të afërta. Ai i akuzoi dy vëllezërit Çopja si të përfshirë në vrasjen e vëllait të tij, Endrit Alibej, gjatë ngjarjes së rëndë të njohur si “Masakra e Bradasheshit” e ndodhur në vitin 2020, ku mbetën të vrarë edhe Arben Dylgjeri dhe shtetasi turk Erdal Durunay.
