Ka dështuar edhe seanca e gjashtë gjyqësore e procesit që Kryetari i Bashkisë së Tiranës, Erion Veliaj, ka nisur ndaj aktivistit Aulon Kalaja. Lajmi bëhet i ditur nga vetë Kalaja përmes një reagimi publik, ku ai akuzon palën paditëse për mungesë të qëllimshme në seancë dhe zvarritje të procesit.
Sipas Kalasë, seanca e datës 13 janar, e caktuar nga gjykata për të nisur shqyrtimin e çështjes në orën 09:30, nuk u zhvillua, pasi Erion Veliaj nuk u paraqit në gjykatë, ndërsa, sipas tij, është dhënë edhe urdhër që të mos paraqitej as avokati mbrojtës.
“Është e paimagjinueshme që personi që ka hapur gjyq ndaj meje të mos vijë të përballet, por t’i bishtnojë drejtësisë”, shprehet Kalaja, duke ngritur pikëpyetje të forta mbi moralin dhe respektimin e ligjit nga ana e paditësit.
Kalaja deklaron se para trupit gjykues ka shprehur bindjen se ndaj tij po ndiqet një strategji presioni përmes gjyqeve të zgjatura, me synimin që ai të mbahet “peng” për të paktën dy vite në procese gjyqësore. Sipas tij, edhe nëse ky proces do të mbyllet, pritet hapja e një padie tjetër.
Gjykata ka vendosur që seanca e radhës të zhvillohet më 26 janar, në orën 13:30. Në rast se pala paditëse nuk paraqitet sërish, gjykata ka caktuar një avokate kryesisht, e cila do të përfaqësojë Erion Veliajn në proces.
Megjithëse e cilëson këtë çështje si një padi strategjike për ta mbajtur nën presion, Aulon Kalaja shprehet se do ta trajtojë procesin me seriozitet dhe do të vijojë përballjen ligjore deri në fund.
Çështja pritet të ndiqet me vëmendje, pasi ngre shqetësime mbi zvarritjen e proceseve gjyqësore, mungesën e palës paditëse dhe përdorimin e gjykatave si instrument presioni ndaj kritikëve publikë.
