Raporti për Shqipërinë, që do të diskutohet në Parlamentin Europian, përmban 305 amendamente të paraqitura nga eurodeputetët. Mes çështjeve të trajtuara janë imuniteti i ish-zv.kryeministres Belinda Balluku, protestat e dhunshme të opozitës, mbështetje për SPAK-un, si dhe zgjedhjet e vitit 2025.
David McAlister, kryetar i delegacionit të PE, ka paraqitur amendamente lidhur me Reformën në Drejtësi, duke vlerësuar procesin e vetting-ut të gjyqtarëve dhe prokurorëve. Ai thekson sfidat që lidhen me efikasitetin e gjyqësorit dhe rëndësinë e mbështetjes për institucionet që luftojnë korrupsionin dhe krimin e organizuar.
Një grup deputetësh, përfshirë Andreas Schieder, theksojnë se protestat e dhunshme nuk kanë vend në demokracitë funksionale, duke shprehur shqetësim për polarizimin politik që minon besimin publik dhe mbikëqyrjen parlamentare. Ndërkohë, amendamenti për kërkesën e SPAK për arrestimin e Balluku sugjeron një presion të mëparshëm, pasi kërkesa ishte refuzuar nga Kuvendi.
Partia Popullore Europiane (PPE) ka dorëzuar gjithashtu 26 amendamente që evidentojnë mangësitë sistemike në zgjedhje, drejtësi dhe qeverisje. Raporti kritikon përdorimin e burimeve publike nga partia në pushtet dhe mungesën e kushteve të barabarta për opozitën, duke nënvizuar nevojën për një reformë zgjedhore që siguron akses të barabartë në media dhe mbrojtje nga keqpërdorimi i burimeve administrative.
Problematikat e gjyqësorit vazhdojnë të jenë shqetësuese, me mbingarkesë çështjesh dhe ndikime të padrejta. Eurodeputetët kërkojnë zbatimin e vendimeve të Gjykatës Kushtetuese dhe theksojnë rolin e SPAK në luftën kundër korrupsionit. Raporti gjithashtu kritikon informalitetin ekonomik dhe mungesën e efikasitetit administrativ, duke rekomanduar auditime të pavarura në prokurimet publike dhe investimet.
Në përfundim, eurodeputetët përmes amendamenteve kërkojnë veprime urgjente nga autoritetet shqiptare për reformën zgjedhore, depolitizimin e administratës dhe luftën kundër korrupsionit, duke paralajmëruar se perspektiva e Shqipërisë për integrimin në BE është në rrezik pa këto ndërhyrje.
