Ish-kryetari i Bashkisë së Kukësit, Safet Gjici ka pretenduar sot në seancën gjyqësore ndaj tij, se është futur në kurth nga ish kryetari i qarkut të Kukësit, Abedin Oruçi në bashkëpunim me Alma Kaçin, e cila i realizoi videon erotike në zyrën e tij brenda bashkisë së qytetit.
Sipas Gjicit, Oruçi edhe e ka sulmuar fizikisht, pasi ai nuk ka lejuar që të zaprojë pronat e Bashkisë Kukës, për të kryer një ndërtim pa leje buzë liqenit të Kukësit.
Në një moment, teksa u përlot në sallën e gjyqit, Gjici i kërkoi ndjesë familjes dhe qytetarëve. Ai theksoi edhe një moment, kur tha se prokuroria nuk po heton pretendimin që atij i është dhënë substancë narkotike.
Deklarata e Gjicit në Gjykatë:
Kam disa gjëra shtesë për të thënë përpos atyre që tha avokati. Përplasja ime me Abedin Oruçin ka nisur që në vitin 2019 kur unë në cilësinë e kryetarit të bashkisë i hoqa atij rrethimin me kangjella hekur të sheshit para bashkisë sepse nuk ishte pronë e tij. Këtë gjë e provova në bazë të dokumetave në Kadastër që ajo tokë nuk ishte e Abedin Oruçit. Bëhet fjalë për 9.3 dylym tokë. Po ashtu unë nuk kam lejuar që Abedin Oruçi të ndërtojë një objekt pa leje në afërsi të liqenit të Kukësit. Po ashtu me Oruçin kam pasur edhe përplasje fizike ditën që ka qenë në Kukës ambasadorja hollandeze.
Kam bërë kallëzim për Oruçin, 5 akuza ka pasur në ngarkim të tij në Prokurorinë e Kukësit por kanë arritur që ti pushojnë. Konflikti mes nesh ka qenë i hapur dhe ai e paguajti Alma Kaçin në shenjë hakmarrje pse unë nuk e lashë të zaptonte pronat e bashkisë dhe të ndërtonte në mënyre të paligjshme. Ai ka qenë 1 vit e ca në kërkim për çështjen e ndërtimeve pa leje. Abedin Oruçi më ka sulmuar për shak të detyrës, që nga 2019 pasi unë s’kam pas asgjë personale kam bërë vetëm detyrën.
Kush më ka dhënë substancë narkotike Alma Kaçi me bashkëpunëtorin e saj pse këtë fakt nuk e heton prokuroria. Pse Alma pasi bëri videon ja dha Abedin Oruçit, pse nuk është hetuar ky fakt, ndërkohë që unë hetohem prej 6 muajsh a thua se kam krijuar organizatë terroriste. Ku është premtimi që i kam bërë unë Alma Kaçit për projektin se nga telefoni im nuk doli asgjë ndërkohë që ajo kishte komunikuar me Oruçin. Unë i thashë shko tek zëvendësi Almës por ajo as aty nuk e dorëzoi. Ne buxhetin e 2023 ne nuk kishim të parashikur një gjë të tillë fond për qentë.
Ata më sulmuan pse nuk i lejova të ndërtojnë pa leje dhe të përvetësojnë tokën. Unë kam marrë denimin më të madh dënimi është moral u kërkoj falje familjarëve të mi dhe qytetarëve të Kukësit (u perlot) Oruçi donte që të iki unë dhe të vinte në zbatim projektet e tij, shkoni në Kukës dhe shikoni si i kanë zaptuar pronat e bashkisë. Abedin Oruçi ndër vite ka pasur 25 çeshtje penale. Unë kërkoj pafajësi, sepse nuk kam shkelur asnjë ligj.
