Derbi mes KF Deçiçit dhe Buduqnostit nga Podgorica përfundoi me barazim 1:1.
Deçiçi kaloi i pari në epërsi, duke mbyllur pjesën e parë me rezultat 1-0, ndërsa në pjesën e dytë mysafirët nga Podgorica barazuan shifrat në 1-1.
Pas ndeshjes, tifozët e Buduqnostit, të njohur për sjelljet e tyre huligane dhe shpesh të motivuara nga urrejtja etnike, shkaktuan trazira në qendër të Tuzit. Duke brohoritur me
kore raciste kundër shqiptarëve, ata sulmuan me gurë dhe mjete të tjera lokale e biznese shqiptare, thyen xhama dhe dëmtuan pronën publike e private. Pamjet e publikuara tregojnë qartë se dhuna nuk mbeti vetëm në dëme materiale, por pati edhe përplasje fizike brutale.
Ky skenar është i përsëritur – tifozët e Buduqnostit kanë shkaktuar vazhdimisht incidente të tilla sa herë që ekipi i tyre luan në Tuz. Pavarësisht kësaj, reagimi i institucioneve mbetet i vonuar dhe i pamjaftueshëm.
Ngjarja ka shkaktuar reagime të forta, mes tyre edhe ministri Marash Dukaj, i cili në një deklaratë të tij shprehet “Ndeshja mbrëmë në Tuz u zhvillua në një frymë sportive, me fair-play dhe një atmosferë të shkëlqyer në fushë. Mirëpo, siç ndodh shumë shpesh, ngjarja u dëmtua nga vandalizmi i disa tifozëve të grupit ‘Varvari’, të cilët pas ndeshjes sulmuan kalimtarët dhe thyen pronat, mes tyre edhe restorantet”.
Evropa e zgjidhi problemin e huliganizmit katër dekada më parë, pas tragjedisë në stadiumin Heysel në vitin 1985, kur 39 persona humbën jetën në përplasjet e tifozëve. Megjithatë, në Mal të Zi vazhdojmë të jemi dëshmitarë të mungesës së një reagimi serioz nga organet kompetente.
