Dy deputetë të PD-së, Oerd Bylykbashi dhe Albana Vokshi së bashku me zyrtarë të tjerë të këtij grupi paraditen e sotme ishin poshtë pallatit ku banon Sali Berisha që ndodhet prej ditës së djeshme në arrest shtëpie. Grumbullimi ka qenë në shenjë solidariteti me liderin e tyre që e njohin si kryetar të PD-së.
“Do i tregojmë Edi Ramës se pavarësisht këtyre kalkulimeve për të shkatërruar opozitën do ta humbasë këtë luftë. 2024 do i tregojë Edi Ramës se regjimi i tij është i kalbur” tha Bylykbashi.
Në mungesë të kryetarit, drejtimin e merr një nga n/ kryetarët, por Bylykbashi e mohoi. “Vendimet për drejtimin e Partisë Demokratike i merr Sali Berisha. Pavarësisht se është i burgosur politik i një regjimi politik, ai do të vazhdojë që të udhëheqë lëvizjen politike për të rrëzuar këtë regjim” tha ai. Akuza hodhi edhe n/kryetari i këtij grupimi, Luçiano Boçi.
