Librazhd-Rastet e konfliktit të interesit janë të rëndomta në institucionet shqiptare, por më i fundit vjen nga Librazhdi. Bëhet fjalë për drejtorin e elektrikut në këtë qytet Behar Terziu. Terziu mban postin e drejtorit qysh kur socialistët erdhën në pushtet në 2013.
Terziu mori drejtimin e institucionit dhe e mban atë aktualisht edhe sot duke mbushur plot 10 vjet si drejtor. Mirpo prej vitesh drejtori është në konflikt të pastër interesi me pozicionin dhe detyrën që mban.
Kjo pasi nëse në zonën e Librazhdit një abonent ka nevojë për një lidhje të re elektrike përvec aplikimit online dhe detyrimeve që paguhen në arkën e Osshee-së, abonenti ka nevojë edhe për një projekt elektrik për ta bashkangjitur me dokumentat e tjera në sistem për tju aprovuar lidhja e re.
Projektin elektrik e përgatit inxhineri elektrik por në Librazhd inxhinier elektrik nuk ka. Ose më saktë, edhe nëse ka nuk mund të ta bëjë pasi ‘monopolin’ e ka vetë drejtori Terziu. Kështu abonenti detyrohet tja paguajë drejtorit (inxhinierit elektrik), tarifën prej 10 mijë lekësh (të reja), dhe merret personalisht drejtori me aplikimin në sistem të abonentit të ri.
Por si e bën Terziu punën e inxhinierit elektrik kur vetë është drejtor dhe bie ndesh në konflikt interesi. Në letrat e aplikimit Terziu nuk përdor kurrsesi emrin e tij por të një kolegu nga Elbasani që është vërtetë një inchinier elektrik i licensuar dhe Terziu thjesht bën një pacavure në letra dhe firma duke futur lekët në xhep pa u sikletosur fare për ligjin me të cilin është në shkelje.
Sipas denoncimeve që janë bërë në portalin tonë rezulton që Terziu e bën këtë shkelje në konflikt të pastër interesi prej disa vitesh por askush nuk e ka denoncuar më herët pasi ju është dukur një procedurë normale që të paguajnë drejtorin për projektin elektrik.
