ANGLI- Dy shqiptar në ‘shtëpi bari’ që jetonin bashkë dhe kujdeseshin për kultivimin e drogës, janë burgosur. Mediat britanike shkruajnë se Klevis Kurti dhe Eljon Mozhika, të dy 22 vjeç, kujdeseshin për 900 bimë në një njësi industriale në Eastbourne. Ata i ujitnin dhe kujdeseshin për bimët dhe ndiznin e fiknin dritat në kohë të ndryshme në mënyrë që të mos ngjallnin dyshime.
Gjykatësi Martin Huseyin u tha dy shqiptarëve, se pothuajse me siguri do të deportoheshin pasi të kishin kaluar të paktën 40 përqind të një dënimi prej 14 muajsh në burg. Njësia industriale e Maple Road u bastis nga një njësi taktike policore më 19 shkurt të këtij viti.
Gjykatësi Huseyin e përshkroi atë si një operacion shumë të madh tregtar dhe tha se burrat ishin qartësisht pjesë e diçkaje shumë më të madhe. Të dy burrat jetonin në kushte të mjerueshme në njësinë industriale dhe nuk kishin marrë kurrë asnjë pagesë.
Gjyqtari Huseyin tha: Bazuar në prova, asnjëri prej jush nuk po bënte asgjë më shumë sesa punën më të thjeshtë dhe të nivelit të ulët. Ju të dy jeni si ingranazhet e vogla në një makinë shumë të madhe.
Gjykata dëgjoi se ishte e mundshme që të dy burrat po punonin për të paguar borxhet midis 3,000 dhe 5,000 paundëve ndaj trafikantëve të njerëzve që i sillnin ata përtej Kanalit në varka të vogla. Gjyqtari tha se të dy burrat kishin ofruar histori të njohura rreth ardhjes nga varfëria dhe punës për të dërguar para në shtëpi për faturat mjekësore të të afërmve.
“Është një histori që e dëgjojmë javë pas jave në këtë gjykatë. Ndoshta po paguanit trafikantët e paligjshëm që ju sollën në Mbretërinë e Bashkuar. Kjo përforcon përshtypjen time se kishte një shkallë shfrytëzimi. Ju u rekrutuat, pa dyshim, për të ardhur në Mbretërinë e Bashkuar për të përmirësuar një jetë mjaft të varfër. Nuk kam dyshim se prisnit fitim financiar, por nuk ka gjasa të keni marrë ndonjë gjë para se të arrestoheshit. Të tjerët i marrin fitimet e konsiderueshme nga 25-75 kg kanabis në vit që ky vend ishte i aftë të prodhonte. Ishte një operacion i sofistikuar me të gjitha pajisjet e nevojshme për një strukturë prodhimi të suksesshme,” tha ai.
