Personi që shihni në foto është Liridon Kraja, truproja i Erogen Vasos i cili mbeti viktimë e atentatit të ndodhur paraditen e së hënës (8 shtator) teksa ishte duke konsumuar kafe në një lokal në Shkodër.
Burimet mediatike bëjnë me dije se 31-vjeçari është truproja i Erogen Vasos (Brajoviç) i cili dyshohet se ishte shënjestra e atentatit, teksa vetë ai përfundoi i plagosur në gjendje kritike për jetën.
Ndërkohë, i vdekur mbeti edhe Armando Pali, kurse autori i dyshuar i ngjarjes është 29-vjeçari Ragip Gila i cili u prangos nga policia pak minuta pas masakrës në tentativë për t’u arratisur.
Gila është një emër i njohur për drejtësinë, i cili rezulton të jetë arrestuar edhe në vitin 2023 për mbajtje pa leje të armatimit dhe pajisjeve të përdorura nga grupet kriminale.
Mësohet se autori i dyshuar Ragip Gila pasi ka ndjekur viktimat brenda lokalit dhe ka qëlluar ndaj tyre, ka dalë jashtë nga një derë dytësore dhe ka ecur në këmbë me armë në dorë për afro 300 metër nga lokali në pjesën e rrugës Don Bosko deri në Perash.
Aty më pas ka grabitur një automjet duke i vënë armën në kokë drejtuesit të makinës. Me makinën e grabitur dhe skafandrë në kokë brenda automjetit, ka tentuar që të largohet derisa ka bërë një aksident në zonën e Sarreqit dhe më pas policia i është vënë në ndjekje duke e arrestuar poshtë shinave të trenit në shtratin e lumit Kir.
