TIRANË- Politikani britanik Nigel Farage ka deklaruar se kryeministri shqiptar Edi Rama ka rënë dakord të marrë mbrapsht të gjithë të burgosurit shqiptarë nga Britania. Sipas The Telegraph, Kreu i Reform UK thotë se ka ka komunikuar me Ramën, në lidhje me një marrëveshje për deportimin e kriminelëve.
“Jam në bisedë me Edi Ramën nga Shqipëria dhe mendoj se ai është mjaft dakord që do të marrë mbrapsht të gjithë të burgosurit shqiptarë në këtë vend, gjë që është mjaft e mirë,” tha Farage.
Komentet vijnë pasi Farage e sfidoi Rama përmes rrjetetve sociale që të pranonte mbrapsht kriminelët shqiptarë. Farage e akuzoi Ramën për hipokrizi për komentet që bëri rreth shndërrimit të Britanisë në një “vend të errët” pas tërheqjes nga BE-ja.
Lideri i Reform UK deklaroi se i gjithë programi i tij politik do të kushtonte 17.4 miliardë paund, të cilat do të siguroheshin përmes anulimit të projektit HS2 dhe heqjes së objektivit për emetimet neto zero. Farage sugjeroi gjithashtu se një qeveri e Reform do të vendoste një sistem me tre dënime për personat që përsërisin shkeljen e ligjit.
“Nëse njerëzit dënohen për më shumë se tre vepra të rënda penale, atëherë, sinqerisht, ne mendojmë se kjo i vendos ata në një rrugë drejt burgimit të përjetshëm,” tha ai të hënën.
The Telegraph shkruan se për të krijuar më shumë kapacitet në burgje, ai propozoi ndërtimin e “burgjeve Nightingale”, një formë burgu të përkohshëm e frymëzuar nga spitalet e ndërtuara gjatë pandemisë së Covid-19
