Zbardhja e buxhetit të sportit si gjithmonë ka pasur debatet, xhelozitë dhe argumentet e ndryshëm të drejtorisë të sportit pranë ministrisë së sportit, për mënyrën e vlerësimit dhe shpërndarjes.
Po si ndahet në të vërtetë ky buxhet sporti në federatat sportive të cilat vetë janë të kategorizuara, në federata olimpike, jo olimpike apo edhe në federata që nuk aplikojnë fare për të marrë para nga shteti siç është rasti federatës së futbollit. Zv.Ministri i sporteve, Endri Hoxha sqaron për Top Channel, mënyrën e përfitimit të buxheteve të federatave.
Ndërkohë Luiza Gega, kampionia e Evropës në atletikë ka qenë sportistja e vetme e cila ka ngritur zërin për buxhetin e federatës të saj, kjo për faktin se federata e atletikës ka një ulje të buxhetit krahasuar me një vit më parë.
“Sinqerisht, kam vërtet përshtypjen që ministrja Evis Kushi s’ka dijeni për këtë logjikën e ndarjes së këtij buxheti. Shpresoj që ta shikojë sa më shpejt. Personalisht si sportiste elitare nuk kam ndonjë interes sado që të jetë buxheti i Federatës por duke qenë se ai ndahet nga performanca që kanë pasur sportistët vitin e kaluar, ndihem e ofenduar që Federatës sime, në vend që t’i ngrihej buxheti, përkundrazi, i është ulur dhe disa Federatave të tjera, ku me gjithë respektin kur ta meritojnë”, ka shkruar Gega.
Ndërkaq ministria ka vendosur të auditojë dhe të jetë prezente në çdo aktivitet për të cilin federatat sportive kanë aplikuar, kanë marrë fondet dhe do të zhvillojnë gjatë vitit 2023./topchannel