Kreu i Grupit të PS-së, Taulant Balla, ka reaguar ashpër ndaj opozitës gjatë Konferencës së Kryetarëve, duke theksuar se thirrjet për revolucione janë të paefektshme dhe se nuk ka vend për alibi për humbjet e radhës. Balla shprehu gatishmërinë e Partisë Socialiste për të bashkëpunuar në miratimin e reformave të nevojshme për Shqipërinë, përfshirë Kodin Zgjedhor të ri dhe Ndarjen Administrative Territoriale.
Ai iu drejtua opozitës duke theksuar se ata nuk kanë aftësinë të bllokojnë reformat, duke përmendur marrëveshjen e arritur në sesionin e kaluar për ngritjen e komisioneve. Balla nënvizoi se nëse opozita tërhiqet nga komisionet, kjo do të ishte një shkelje e njëanshme e marrëveshjes. Ai theksoi se puna do të vazhdojë edhe pa pjesëmarrjen e opozitës.
Balla përmendi rëndësinë e Komisionit të Posaçëm të Reformës Zgjedhore, duke e lidhur atë me rekomandimet e OSBE-ODIHR-it, ku theksi vihet te depolitizimi i administratës zgjedhore. Ai e cilësoi si të papranueshme situatën ku partitë e numërojnë votat, duke kërkuar që rezultati i zgjedhjeve të shpallet më shpejt dhe madje të merret në konsideratë numërimi në qendrat e votimit.
Në lidhje me reformën zgjedhore, Balla theksoi se nevojiten të paktën 84 vota në Kuvend, por kjo nuk është e mjaftueshme. Ai shpreh ambicien për një reformë më të thellë, që do të përfshijë edhe zvogëlimin e numrit të deputetëve në Kuvendin e Shqipërisë në 100 apo 101 deputetë.
Më tej, Balla iu përgjigj mbi vërenjtjet e opozitës për mohim të të drejtës së fjalës, duke zbuluar se gjatë sesionit të kaluar opozita kishte marrë 48 orë diskutimesh, ndërsa shumica dhe Qeveria përfitoi 40 orë. Kjo situatë ka nxjerrë në pah një indikator të rëndësishëm mbi trajtimin e kohës së diskutimeve në Kuvend.
