David Beckham i ka dorëzuar kontrollin e llogarisë së tij në Instagram një mjeku në Ukrainë, në përpjekje për të nxjerrë në pah punën e mahnitshme të profesionistëve mjekësorë që kujdesen për pacientët në mes të pushtimit rus të vendit.
Iryna tha se tani punon “24/7″: “Ekipi im ndoshta rrezikon jetën duke punuar gjatë konfliktit, por ne e duam profesionin tonë. Ditën e parë të luftës, të gjitha gratë shtatzëna dhe nënat u evakuuan në bodrum. Ishin tri orë të tmerrshme që i kaluam së bashku. Fatkeqësisht, ne nuk mund t’i çojmë foshnjat që janë në kujdes intensiv në bodrum, sepse mbështeten në pajisje për shpëtimin e jetës”.
Më pas, mjekja ukrainase postoi fotografi të të porsalindurve në njësinë e kujdesit intensiv, të lidhur me gjeneratorët e oksigjenit. Në një tjetër video, ajo filmoi një nënë të re, Yana, duke mbajtur në krahë djalin e saj, Mykhailo, i cili lindi me probleme të frymëmarrjes.
“Ditët e para ishin më të vështirat. Ne duhej të mësonim se si të punonim me bombardime mbi krye. Dita ime e punës është 24/7 tani, jam këtu gjithë kohës, – vazhdoi Iryna. – Tani, jo vetëm që jam drejtuese e qendrës, por vazhdoj të punoj si anesteziologe pediatrike. Punoj në logjistikë dhe ofroj mbështetje emocionale”.
Beckham ka nisur një thirrje urgjente përmes UNICEF-it për të ndihmuar në ofrimin e ndihmës për të prekurit në vendin e shkatërruar nga lufta. Në Instagram, babai i katër fëmijëve iu kërkoi ndjekësve të tij të dhurojnë për UNICEF-in, i cili po punon në Ukrainë për t’u siguruar familjeve akses në ujë të pastër dhe ushqim, për të siguruar që shërbimet e mbrojtjes së fëmijëve të vazhdojnë dhe të vlerësojnë situatën e refugjatëve në vendet fqinje:
“Falë donacioneve tuaja, gjeneratorët e oksigjenit po i ndihmojnë të sapolindurit të mbijetojnë në kushte të tmerrshme. Ju lutemi, vazhdoni t’i mbështesni këta njerëz të jashtëzakonshëm! Së bashku ne mund të bëjmë vërtet ndryshimim”.
