Anis Mehmeti po tregon formë të shkëlqyer me Ipswich Town, skuadër në të cilën u transferua nga Bristol City. Sulmuesi shqiptar ka qenë kyç në fitoren e fundit të skuadrës ndaj Derby County, duke e bërë atë një kërcënim konstant për mbrojtjen e kundërshtarit.
Në një deklaratë për Sky Sports, Mehmeti e përshkroi fitoren në Pride Park si një moment të rëndësishëm, duke theksuar vështirësitë e kësaj fushe. “E dimë që Pride Park është gjithnjë një fushë e vështirë dhe ne erdhëm këtu për të rikthyer rezultatet pozitive pas dy ndeshjeve të fundit dhe kjo ndodhi. Djemtë ishin këmbëngulës dhe unë jam shumë i kënaqur që morëm 3 pikët,” tha ai.
Mehmeti shprehu kënaqësinë e tij për qëndrimin te Ipswich dhe ambiciet që ndan me ekipin. Ai theksoi, “Më pëlqen këtu. Erdha me ambicjen që bashkë me këtë klub të ngjitem në Premier League. Po e shijoj kohën time këtu dhe çdo ditë e marrim si të na vije, duke iu gëzuar futbollit dhe duke u përpjekur që të kontribuojmë në fitore.”
Duke reflektuar mbi pjesën e mbetur të sezonit, ai u shpreh optimist, duke besuar se skuadra ka potencialin për të arritur objektivat e saj. “Kemi besim, djemtë e kanë bërë këtë edhe më parë. I marrim gjërat me radhë, ditë pas dite. Për mendimin tim, jemi skuadra më e mirë e kampionatit. Kështu i kemi të gjitha shanset të bëjmë atë që duhet të bëjmë, që është fitorja e ndeshjeve dhe shpresojmë të arrijmë objektivin në fund të sezonit,” përfundoi Mehmeti.
Mehmeti vazhdon të ketë një rol të rëndësishëm në përpjekjet e Ipswich për të përmirësuar pozitat e tyre në kampionat dhe për të realizuar ambiciet e larta për ngjitje në Premier League.
