Kanë përfunduar dy ndeshjet e orës 18:45 të kësaj të marte në UEFA Champions League. Chelsea ka fituar 2-1 përballë Salzburg. Ndërsa, Sevilla ka triumfuar 3-0 ndaj Kobenhavn.
Në takimin e zhvilluar në “Red Bull Arena”, miqtë nga Londra dominuan takimin dhe në fund dolën me tri pikët, të cilat i dërgojnë në raundin tjetër të Champions League, atë me eliminim direkt.
Blutë realizuan golin e parë të takimit në minutën e 23 të pjesës së parë me anë të mesfushorit kroat, Mateo Kovacic.
Me fitoren e arritur, Chelsea shkon në kuotën e 10 pikëve në krye të Grupit E. Salzburg ka gjashtë pikë. Milan dhe Dinamo Zagreb, që ndeshen në mbrëmje me njëri-tjetrin kanë nga katër pikë.
Në sfidën tjetër të luajtur në “Ramon Sanchez Pizjuan”, pjesa e parë u mbyll me rrjeta të paprekura, ndërsa vendasit do të realizonin tre herë në pjesën e dytë.
Youssef En-Nesyri do të hapte serinë e golave për Sevilla-n në minutën e 61. Katër minuta më herët, VAR i anuloi një 11 metërsh në favor sulmuesit maroken.
Goli i dytrë për vendasit do të vinte në minutën e 88, me autor mesfushorin spanjoll, Isco. Ndërsa, ndeshja do të vulosej nga goli i Gonzalo Montiel në minutën e dytë të kohës shtesë.
Fitorja i jep shpresë Sevilla-s për një kualifikim të mundshëm. Ata kanë pesë pikë në renditje. Grupi G, ku bëjnë pjesë spanjollet kryesohet nga Manchester City me 10 pikë. Shtatë pikë ka Dortmund-i i vendit të dytë. Ndërsa, Kobenhavn ka dy pikë.
Në mbrëmje Dortmund-i do të përballet me City-n në “Signal Iduna Park”.
Gjithashtu në mbrëmje do të luhen dhe takimet e tjera:
Celtic – Shakhtar Donetsk
Leipzig – Real Madrid
PSG – Maccabi Haifa
Benfica – Juventus
