Tërmeti i fuqishëm me magnitudë 8.8 në Kamçatka ka rikthyer vëmendjen në “Unazën e Zjarrit”, një nga zonat më të rrezikshme sizmike dhe vullkanike në botë, e cila shtrihet përgjatë pellgut të Oqeanit Paqësor dhe përfshin vende si Japonia, Kili, Filipinet dhe SHBA-të. Kjo zonë përbën një hark gjeologjik 40,000 kilometrash, ku ndodhen 452 vullkane dhe ndodhin 90% e tërmeteve në botë, duke përfshirë 81% të tërmeteve më të mëdha.
“Unaza e Zjarrit” është rezultat i lëvizjes së pllakatave tektonike, ku ato oqeanike rrëshqasin poshtë atyre kontinentale, duke krijuar zona subduksioni dhe vullkane. Ky proces çon në lëshime të dhunshme të energjisë që shpesh shkaktojnë tërmete, shpërthime vullkanike dhe tsunami. Vendet më të rrezikuara përfshijnë Kili, Japoni, Indonezi, Ishujt Solomon, Bregun Perëndimor të Shteteve të Bashkuara, Alaska, Meksikë, Peru dhe Zelanda e re.
Pavarësisht përparimeve në shkencë, sizmologët nuk janë në gjendje të parashikojnë se kur do të ndodhin tërmetet e mëdha. Pllakat tektonike lëvizin disa centimetra në vit, por gjatë një tërmeti kjo lëvizje mund të arrijë disa metra në sekonda, duke shkaktuar shkatërrime masive.
“Unaza e Zjarrit” është më shumë se një koncept gjeologjik; ajo është një kujtesë për fuqinë e natyrës dhe rrezikun që paraqet për miliona njerëz në zonat e prekura.
