Kryeministri Edi Rama, gjatë rubrikës “Sy më sy” live nga qyteti i Gjirokastrës, iu përgjigj një qytetari që i kërkoi llogari për 12 vitet e qeverisjes së tij.
Përballë pyetjes “Çfarë ke bërë në 12 vite?”, Rama renditi disa nga arritjet që, sipas tij, kanë transformuar vendin duke e çuar në prag të Bashkimit Europian”.
“Kemi bërë 1 mijë kilometra rrugë europiane në mbarë vendin. E solla Shqipërinë në pragun e BE-së, kemi ndërtuar shkolla dhe spitale të reja,” tha Rama. Ai shtoi se një listë e plotë e punëve të bëra do të kërkonte “të paktën 10 ditë për t’u treguar”.
Kryeministri u ndal edhe te situata politike, duke kritikuar ashpër opozitën. “Këta nuk dinë të bëjnë opozitë, dinë vetëm të vetëshkatërrohen.
Prandaj në zgjedhjet e ardhshme do të marrin rezultatin më të keq që nga viti 1997,” theksoi ai.
Sa i përket zhvillimeve ekonomike, Rama theksoi se Shqipëria ka përjetuar një rritje të ndjeshme të të ardhurave: “Të ardhurat për frymë nga 3 mijë e pak euro kanë shkuar mbi 10 mijë, paga mesatare ka qenë 370 euro, është sot 830 euro.”
Në fund, kryeministri theksoi rritjen e ndjeshme të turizmit si dëshmi e transformimit të vendit: “Vendi është mbushur plot me turistë, këtu është bërë derë e bujtinë.”
Edi Rama: Njëri thotë se çfarë ke bërë në 12 vite? Kemi bërë 1 mijë kilometra rrugë europiane në mbarë vendin. E solla Shqipërinë në pragun e BE-së, kemi ndërtuar shkolla dhe spitale të reja. Duhen 10 ditë për të treguar se çfarë kam bërë në 12 vite. Këta nuk dinë të bëjnë opozitë, këta dinë vetëm të vetëshkatërrohen dhe të dëmtojnë veten. Prandaj, në zgjedhje do të marrin rezultatin më të keq nga 1997 e këtej. Kemi rritur ekonominë, të ardhurat për frymë kanë qenë 3000 e pak euro, janë mbi 10 mijë. Paga mesatare ka qenë 370 euro, është 830 euro etj. Tani kujt ia tregon barkun thatë? Vendi është mbushur plot me turistë, këtu është bërë derë e bujtinë. Shqipëria ishte gropë, sot është në pragun e BE-së.
