TIRANA- Kryeministri Edi Rama ka bërë me dije sot se për çështje javësh do të jetë gati një tjetër asistent virtual në e-Albania që do të kryejë të gjitha shërbime. Deklaratën Rama e bëri teksa ka marrë pjesë në eventin për dorëzimin e certifikatave për rezidentët e parë te “Durana Tech Park”. Ai theksoi se kjo është një surprizë “e bukur” për ta, në interes për t’u bërë pjesë e shoqërisë dixhitale të “Durana Tech Park”.
“Sot ky park faktikisht çon përpara një revolucion dixhital që do të vazhdojë hap pas hapi me shumë intensitet, së shpejti do të prezantojmë modelin tjetër të inteligjencës artificiale në shërbimet publike, do të kalojmë nga asistentja dixhitale i e-Albania që vetëm orienton marrësit e shërbimeve me zë, në një nivel krejt tjetër ku asistentja do të bëjë të gjithë punën që sot hyn dikush për të marrë shërbimin.
Asistentja nuk do të të orientojë, por do të marrë porosi me gojë dhe do të bëjë shërbimin. Kjo është çështje javësh në mos 1 apo dy muajsh që ky nivel tjetër i asistencës në shërbimet digjitale të bëhet i aksesueshëm për publikun. Ajo është një surprizë e bukur për ne, në interes për t’u bërë pjesë e shoqërisë dixhitale të Durana Tech Park”, tha Rama.
