Jamie Carragher ka shprehur kritika të ashpra ndaj Mohamed Salah pas komenteve të forta që sulmuesi egjiptian bëri ndaj trajnerit të Liverpoolit, Arne Slot. Salah është lënë në stol për ndeshjen e tretë radhazi në Premier League dhe shprehu hapur pakënaqësinë e tij, deklarata që kanë shkaktuar debat në Angli.
Sipas Carragher, një nga legjendat e klubit, Salah po harron disa të vërteta themelore. Ai theksoi se sulmuesi nuk ishte ndonjë figurë e madhe para se të arrinte te Liverpooli dhe nuk ka arritur shumë me përfaqësuesen e Egjiptit. Carragher nënkuptoi se suksesi i Salah-it është rezultat i përpjekjeve kolektive. “Pavarësisht se sa i mirë je, nuk bën asgjë vetëm. Duhet t’i kujtojë vetes këtë. Me Salah gjithçka është ‘unë, unë, unë’,” deklaroi ai.
Carragher e cilësoi sjelljen e Salah-it pas ndeshjes si të papranueshme dhe shprehu mendimin se ndalimi i tij në zonën e mikse ishte i planifikuar për të krijuar presion dhe dëm maksimal. Këto komente vetëm sa intensifikuan tensionin lidhur me situatën e Salah, i cili është një nga figurat kyçe të Liverpoolit, por aktualisht po përballet me minutazh të pakët dhe një marrëdhënie të ftohur me trajnerin e tij.
Salah, që është pjesë e rëndësishme e skuadrës, duket se po kalon një periudhë të vështirë, dhe situata e tij në ekip pritet të përshkallëzohet edhe më tej. Tifozët e Liverpool-it po e ndjekin me shqetësim këtë konflikt mes sulmuesit dhe klubit, duke pritur se si do të zhvillohet më tej kjo përballje në javët e ardhshme.
