Italiani Carlo Ancelotti do të jetë trajneri i kombëtares së Brazilit nga “Copa América” 2024, e cila do të organizohet në qershor dhe korrik të vitit të ardhshëm në SHBA, pasi t’i përfundojë kontrata me Real Madridin. Këtë lajm e konfirmoi një burim i AFP nga Konfederata Braziliane e Futbollit (CBF).
CBF gjithashtu tha në një deklaratë, disa minuta më parë, se Fernando Diniz (Fluminense) do t’i udhëheqë pesë herë kampionët e botës derisa Ancelotti të marrë detyrën. Trajneri 64-vjeçar italian ka kontratë me Real Madridin deri në qershor të vitit 2024 dhe ka thënë publikisht se dëshiron të vazhdojë në “Bernabeu” deri atëherë.
Ky njoftim i bërë nga një burim i nivelit të lartë brenda CBF, i cili nuk deshi t’i përmendej emri, iu jep fund negociatave disamujore mes trajnerit të njohur italian dhe kreut të federatës braziliane, Ednaldo Rodrigues, i cili gjithmonë e ka konsideruar Ancelottin të preferuarin e tij.
Ancelotti do të bëhet i huaji i katërt, që do të marrë frenat e “Selecao”, i pari në pothuajse 60 vitet e fundit. Megjithatë, italiani kishte deklaruar në disa raste se do të tërhiqej pas kësaj periudhe të fundit në stolin e Real Madridit, pas gati 30 vitesh në fushë. Por më në fund ai u josh nga Brazili, një vend ku futbolli është “mbreti”.
Sfida është tejet ambicioze. Pesë herë kampionët e botës po ndjekin yllin e tyre të gjashtë në më shumë se 20 vite, që nga titulli i tyre të fundit më 2002.
