TIRANË- Në Shqipëri, qelitë e kriminelëve më të rrezikshëm janë kthyer në dhoma luksi ku “takimet speciale” me modele dhe eskorta bëhen me lejen ose heshtjen e strukturave shtetërore. Një praktikë që askush nuk guxon ta prekë me dorë apo fjalë, sepse është vetë shteti që e kamuflon, e mban në heshtje dhe në raste të caktuara, e mbron.
Burimet konfirmojnë se të dënuarit me burgim të përjetshëm, përfshirë figura kyçe të krimit të organizuar, kanë akses në vajza që prezantohen si modele, influencuese, apo moderatore, por që në realitet janë pjesë e një rrjeti eskortash që hyjnë e dalin nga ambientet e burgut si vizitore të “regjistruara”. Në dokumente zyrtare, këto janë takime familjare. Në realitet, ato janë pjesë e një trafiku të organizuar ndikimi dhe seksit, të mbështetur nga pagesa që variojnë nga 3.000 deri në 10.000 euro për takim.
Ndërkohë, një kontrast i thellë moral vërehet në qasjen ndaj grave të dënuara. Në burgun e grave në Pojskë, Pogradec, të dënuarat nuk lejohen të zhvillojnë asnjë lloj takimi special, përfshirë ato me bashkëshortët e tyre.
“Arsyetimi lidhet me frikën se mund të mbeten shtatzënë dhe kështu të përfitojnë nga lehtësimi i dënimit. Prandaj, për këtë arsye, atyre u ndalohet kategoria e takimeve speciale.”-tha gazetari Eni Ferhati.
Kjo masë, e paraqitur si mbrojtje ndaj abuzimit të sistemit, nuk është zbatuar në mënyrë të barabartë. Ndërsa gratë ndalohen që të kenë kontakt me burrat e tyre për të shmangur “përfitime”, meshkujt lejohen të kenë takime me vajza të rekrutara si eskorta, në shumicën e rasteve pa asnjë lidhje farefisnore apo ligjore. Sigurisht me bekimin e drejtorëve të burgjeve të cilët janë më të fituarit në këtë histori.
