Gjykata Kushtetuese ka rrëzuar mazhorancën duke rrëzuar ligjet e miratuara gjatë kohë së pandemisë COVID-19.
Në një vendim të marrë ditën e sotme, Kushtetuesja, ka pranuar pjesërisht kërkesën e Komitetit Shqiptar të Helsinkit, duke shfuqizuar dy dispozitave të Kodit Penal (nenet 89/b dhe 242/a), të miratuara në fillim të periudhës së Pandemisë.
Bëhet fjalë për nenet ku caktohej se kush përhapte virusin nga pakujdesia dënohej me burg dy deri në pesë vjet, në varësi të pasojave që kishte shkaktuar.
Njoftimi i plotë:
Gjykata Kushtetuese pranon pjesërisht kërkesën e Komitetit Shqiptar të Helsinkit dhe deklaron antikushtetues dy paragrafë të nenit 89/b të Kodit Penal të RSH
KSHH argumentoi nevojën për shfuqizimin e dy dispozitave të Kodit Penal (nenet 89/b dhe 242/a), të miratuara në fillim të periudhës së Pandemisë. Që në momentin kur këto dispozita u propozuan me anë të amendamenteve nga deputetja E.Bode, në Prill të vitit 2020, KShH së bashku me disa organizata të shoqërisë civile reaguan duke vërejtur se cenoheshin parime të rëndësishme kushtetuese si parimi i shtetit të së drejtës, ndalimi kushtetues ndaj Kuvendit për të mos miratuar me procedurë të përshpejtuar ligje që kërkojnë shumicë të cilësuar, parimin e proporcionalitetit sipas nenit 17 të Kushtetutës. Masat kufizuese në legjislacionin penal u vlerësuan nga OSHC si masa të ashpra dhe ekstreme, që nuk i përgjigjeshin në mënyrë proporcionale situatës në të cilën ndodhej vendi ynë.
KShH gjithashtu, në kërkesën drejtuar Gjykatës Kushtetuese argumentoi se cenoheshin të drejtat dhe liritë kushtetuese, sikurse janë liria e lëvizjes apo liria personale, barazia para ligjit dhe e drejta për një jetë private dhe familjare të qetë. Në funksion të shqyrtimit të kësaj kërkese, Gjykata Kushtetuese me nismën e saj ka kërkuar mendim nga Institucione të Pavarura Kushtetuese (Avokati i Popullit) apo të krijuara me ligj (Komisioneri për Mbrojtjen nga Diskriminimi), të cilat kanë konfirmuar problemet kushtetuese të dispozitave të Kodit Penal, të analizuara në optikën e misionit dhe veprimtarisë së tyre.
Gjykata Kushtetuese, pasi shqyrtoi në seancë plenare publike kërkesën e Komitetit Shqiptar të Helsinkit, ka shpallur ditën e sotme (15 Dhjetor 2022), vendimin e marrë me shumicë votash, për pranimin pjesërisht të kërkesës dhe shfuqizimin e paragrafëve të dytë dhe të tretë të nenit 89/b të Kodit Penal. Vlen të kujtojmë për publikun se neni 89/b i Kodit Penal ka në përbërje të tij tre paragrafë, ku sanksionohet si vepër penale përhapja e sëmundjeve infektive, përkatësisht si vijon:
Neni 89/b
Përhapja e sëmundjeve infektive (Shtuar me ligjin nr. 35/2020, datë 16.4.2020)
1. Përhapja me dashje e sëmundjes infektive me rrezikshmëri të lartë për shëndetin, nëpërmjet kryerjes së veprimeve ose mosveprimeve nga personi që është diagnostikuar si mbartës i sëmundjes apo nga personi që ka qëllim përhapjen e saj, dënohet me burgim nga dy deri në pesë vjet.
2. Kur kjo vepër është kryer nga pakujdesia, dënohet me gjobë ose me burgim deri në dy vjet.
3. Po kjo vepër, kur ka shkaktuar pasoja të rënda për shëndetin ose rrezik për jetën e njerëzve, dënohet me burgim nga tre deri në tetë vjet.
Me interes për jurisprudencën e Gjykatës Kushtetuese dhe rëndësinë që ka legjitimiteti i organizatave jofitimprurëse që e vendosin në lëizje këtë Gjykatë, përbën arsyetimi i këtij vendimi i cili do të realizohet në vijimësi, në përputhje me afatet e parashikuara në ligjin organic të Gjykatës Kushtetuese.
