Brajan Gruda është larguar nga grumbullimi i Gjermanisë pasi ka pësuar një dëmtim në stërvitjen e fundit të “Panzerave”.
Klubi i Mainz bëri të ditur se talenti 20 vjeçar kishte pësuar një dëmtim dhe që nga mëngjesi i sotëm është larguar nga grumbullimi, për të nisur fazën e rikuperimit.
Sipas klubit, situata e tij aktuale nuk do ta pengonte që ai të kthehej në kohë për fillimin e stërvitjeve me klubin për sezonin e ri, gjë që linte të kuptohej se gjendja e tij nuk ishte shqetësuese.
Gjithsesi, për lojtarin me origjinë shqiptare kjo ishte një goditje në vetvete, pasi shpresonte të ishte pjesë e Gjermanisë të paktën deri në ndeshjen miqësore ndaj Greqisë, e pse jo, edhe të kishte shansin të bënte debutimin në atë sfidë.
Ai u ftua si lojtar shtesë për pak ditë fillimisht nga trajneri Julian Nagelsman, i cili më pas vendosi që ta mbante më shumë në stërvitje, derisa të shpallte listën përfundimtare të atyre që do të luanin në Europian.
