Për shkak të reshjeve të dendura të shiut është shembur ura e Bahçallekut në Shkodër, duke bllokuar qarkullimin në këtë zonë. Duke marrë shkak nga problemet e shumta që ka hasur qarku i Shkodrës kryebashkiaku Bardh Spahia ju bëri thirrje qytetarëve që të tregojnë kujdes dhe të pranojnë evakuimin në rast se do të jetë nevoja.
“Shkodra është pa komunikim normal me pjesën tjetër të vendit. Jemi detyruar të mbyllim qarkullimin në urën e Bahçallekut pas shembjes së urës së vjetër. Kjo gjendje paraqet rrezikshmëri shumë të lartë dhe kërkon vlerësim maksimal nga autoritetet përgjegjëse. Bllokimi i qarkullimit si masë parandaluese ishte i detyruar, por nuk mund të zgjasë në këtë emergjencë që ndodhemi.
Ju kërkova banorëve të kësaj lagjeje si dhe Ajasmës që të mos rrezikojnë jetën e tyre, por në momentin më të parë që paraqitet nevoja, të evakuohen. Strukturat tona do të jenë në terren për ta ndjekur hap pas hapi situatën, që për fat të keq po përkeqësohet.”, tha Spahia.
