Pas shtatë vitesh në Greqi, Lulëzim Dulla u rikthye në fshatin e tij, Kurjan në Roskovec, për t’u angazhuar në blegtorinë dhe bujqësinë. Duke nisur me një lopë, ai, së bashku me tre djemtë e tij, ka ndërtuar një fermë moderne me rreth 90 krerë lopë dhe viça. Ferma prodhon rreth 600 litra qumësht në ditë, që shitet tek kompanitë përpunuese, duke siguruar një burim të qëndrueshëm të të ardhurave për familjen Dulla.
Për të ushqyer bagëtitë, Dulla ka marrë me qira rreth 70 hektarë tokë, ku kultivon foragjere. Sidoqoftë, ai përballet me sfida si mungesa e subvencioneve, pasi pronarët e tokave shpesh nuk paguajnë taksat, duke lënë tokat në braktisje. “Shumica e pronarëve janë të emigrantë dhe nuk mbajnë dokumentacionin e nevojshëm,” shprehet Dulla. Ai thekson nevojën për ndihmë nga shteti, veçanërisht në lidhje me çmimin e naftës.
Një tjetër sfidë për Lulëzimin është konkurrenca nga produktet e importuara. Ai vëren se sasinë e madhe të qumështit dhe nënprodukteve të jashtme, të cilat shiten me çmime më të ulëta, e kanë të vështirë prodhimin vendas. “Produktet e importuara ulën çmimin e tregut dhe rrisin kostot tona. Shtetet e tjera subvencionojnë fermerët e tyre, ndërsa ne përballim çmime të larta për çdo gjë,” thotë ai, duke shtuar se kjo situatë ka kontribuar në migrimin e shumë të rinjve jashtë vendit.
Ndërsa shumë ferma të vogla po mbyllen dhe rinia largohet, familja Dulla mbetet një shembull përkushtimi dhe punë në fushën e blegtorisë në Myzeqe, duke dëshmuar se është e mundur të mbahen traditat dhe zhvillimi në bujqësi.
