Biznesmeni italian Massimo Ferro, 54 vjeç, nga Camposampiero, vendosi të trajtojë obezitetin pas vitesh përpjekjesh të pasuksesshme. Ai iu drejtua një klinike private në Milano, që ofronte një zgjidhje afatgjatë, me operacionin e programuar në Tiranë. Më 18 dhjetor, Ferro u nënshtrua një operacioni për ngushtim stomaku, por pesë ditë më vonë, më 22 dhjetor, ai humbi jetën.
Pas vdekjes së tij, prokurori i Padovës, Andrea Girlando, regjistroi si të dyshuar kirurgun Andrea Formiga dhe dietologen Alessandra Freda, të dy nga Lombardia. Autopsia për trupin e Ferro-s do të kryhet nga mjeku ligjor Antonello Cirnelli në Padova.
Sipas raportimeve, komunikimi i parë mes Ferro-s dhe kirurgut u zhvillua në dhjetor përmes WhatsApp-it, ku u diskutuan informacionet për ndërhyrjen dhe kostot. Œmimi i operacionit ishte 4.400 euro, ndjeshëm më i ulët se sa rreth 15 mijë euro në Itali. Në vizitën e tij me 6 dhjetor, kirurgu e siguroi Ferro-n për procedurën dhe një rikuperim të shpejtë, megjithëse ai vuante nga diabeti dhe pesha prej 108 kilogramësh. Analizat e nevojshme u realizuan një ditë para operacionit, direkt në Tiranë.
Kallëzimi nga familja thekson se asnjë nga procedurat e rekomanduara për kirurgjinë e obezitetit nuk u respektuan. Nuk u realizua një program paraprak dietetik ose një vlerësim multidisiplinar para ndërhyrjes. Massimo mbërriti në Tiranë më 17 dhjetor, i shoqëruar nga bashkëshortja.
Pas operacionit, Ferro komunikoi me familjarët e tij, duke thënë se gjithçka shkoi mirë. Megjithatë, gjendja e tij përkeqësohej ditëve në vazhdim; ai vuante nga përgjumje dhe glicemia e lartë, dhe më 20 dhjetor shfaqi ethe. Më 21 dhjetor, me temperaturë 39 gradë dhe vështirësi në frymëmarrje, ai u dërgua në spitalin “Nënë Tereza” të Tiranës. Diagnostikimi dhe trajtimi ishin të ngadalta, dhe gjendja e tij u rëndua gjatë natës.
Mëngjesin e 22 dhjetorit, Ferro pësoi një arrest kardiak dhe u transportua në reanimacion, ku pasdite mjekët deklaruan stabilizimin. Sidoqoftë, kur bashkëshortja erdhi në spital, ajo u informua se ai kishte ndërruar jetë. Familja e tij është e shqetësuar dhe kërkon shpjegime për vdekjen e Massimo Ferro-s.
