Zëvendëspresidenti i parë i Iranit, Mohammad Reza Aref, ka ashpërsuar retorikën ndaj SHBA-së para bisedimeve të rëndësishme që do të zhvillohen në Islamabad. Në një postim në rrjetet sociale, Aref theksoi se një marrëveshje paqeje mund të arrihet vetëm nëse Shtetet e Bashkuara veprojnë sipas interesave të tyre, duke iu referuar doktrinës “Amerika e Para” të presidentit Donald Trump.
Ai nënvizoi se nuk do të ketë asnjë marrëveshje nëse pala amerikane përfaqëson interesat e Izraelit, duke përdorur termin “Izraeli i parë”. Aref paralajmëroi gjithashtu se dështimi i bisedimeve mund të sjellë pasoja të rënda globale, përfshirë mundësinë e rifillimit të konfliktit mes SHBA-së, Izraelit dhe Iranit.
Tensionet mbeten të larta dhe ende nuk ka detaje konkrete nga bisedimet, ndërsa deklaratat nga të dyja palët po rrisin pasigurinë për rezultatin e tyre.
