Alice dhe Ellen Kessler, binjaket të njohura në botën e argëtimit, kanë ndërruar jetë në moshën 89-vjeçare. Mediat gjermane raportojnë se ato, të lindura më 20 gusht 1936 në Saksoni, zgjodhën eutanazinë e asistuar, që në Gjermani lejohet vetëm në kushte të veçanta.
Këngëtare dhe valltare të njohura në Europë, Kessler u bënë të famshme që në vitin 1959, duke fituar emrin “këmbët e kombit” për përformancat e tyre të paharrueshme. Sipas “Bild”, motrat kishin shprehur dëshirën për të qenë “të pandashme edhe në vdekje” dhe do të varrosen së bashku në një urnë, pranë hirit të nënës së tyre, Elsa, dhe qenit të tyre, Yello.
Një patrullë policie mbërriti në banesën e motrave Kessler pas vdekjes së tyre, duke konfirmuar që nuk kishte elemente krimi. Alice dhe Ellen Kessler ishin shprehur për eutanazinë që në vitin 2012, duke theksuar se do të ndihmonin njëra-tjetrën nëse ndonjëra prej tyre do të ishte në gjendje vegjetative. Ligji gjerman kërkon që ato të veprojnë me vullnet të lirë dhe në plotësinë e aftësive mendore, ndërsa “eutanazia aktive” mbetet e ndaluar.
Karriera e tyre mori flakë pas zhvendosjes në Itali në vitin 1961, me paraqitje në programet “Giardino d’inverno” dhe “Studio Uno”, ndërsa kënga “Da-da-un-pa” i vendosi ato në qendër të kulturës së viteve ‘60. Në vitin 2006, Kessler vendosën të dhuronin pasurinë e tyre organizatës humanitare “Mjekët pa Kufij”, duke shprehur shqetësimin për nevojat e shumta në botë.
Vdekja e Alice dhe Ellen Kessler shënon fundin e një epoke për dy nga ikonat më të mëdha të skenës europiane.
