Sekretari amerikan i mbrojtjes, Pete Hegseth, tha se buxheti i ardhshëm i mbrojtjes së SHBA-ve do të zvogëlojë ndihmën ushtarake për Ukrainën.
Në një ndryshim të dukshëm nga politika amerikane nën presidentin e mëparshëm Joe Biden, Hegseth tha se administrata Trump favorizon një zgjidhje të negociuar në vend të mbështetjes së vazhdueshme ushtarake.
SHBA-të kanë ofruar më shumë se 66 miliardë dollarë ndihmë për Ukrainën që nga fillimi i pushtimit në shkallë të plotë të Rusisë në shkurt 2022.
“Është një reduktim në këtë buxhet,” tha Hegseth, ndërsa shtoi se kjo administratë ka një pikëpamje shumë të ndryshme për atë konflikt.
“Ne besojmë se një zgjidhje paqësore e negociuar është në interesin më të mirë të të dyja palëve dhe në interesat e kombit tonë, veçanërisht me të gjitha interesat konkurruese në të gjithë globin.”
Njoftimi vjen ndërsa Rusia vazhdon të nisë sulme pothuajse të përditshme me dronë dhe raketa ndaj Ukrainës.
Sulmet e nisura nga Moska të hënën në mëngjes përbënin sulmin më të madh ajror me të cilin është përballur Ukraina që nga fillimi i luftës, me ushtrinë e Kievit që raportoi se 479 dronë dhe 20 raketa u qëlluan nga Rusia.
