Pikat e lojërave të fatit janë kthyer sërish në një problem për lagjet e qyteteve shqiptare. Dikur me makina “e kuqe e zezë” në çdo cep pallati, sot bastet vendosen nëpër lokale, përmes celularëve, nën mbrojtjen e të fortëve dhe shpesh edhe të Policisë së Shtetit.
Skyweb.al publikoi disa muaj më parë një investigim mbi mënyrën si janë organizuar bastet sportive, shtatë vite pas operacionit “Fundi i marrëzisë”, duke treguar se marrëzia është përhapur edhe më shumë.
Në investigim u shpjeguan mënyrat e funksionimit të tregut, aktorët kryesorë dhe arsyet pse kompanitë hezitojnë të legalizohen, pasi u kushton më lirë të qëndrojnë jashtë sistemit se sa të paguajnë taksa.
Ndërkohë, përballë rezistencës së disa aktorëve për t’u licencuar, të tjerë po kërkojnë me ngulm hyrjen në treg. Marrja e një ose disa prej 10 licencave është kthyer në një garë të fortë, ku sipas VoxNews janë përfshirë edhe ndërhyrje në nivele të larta të qeverisë.
Raportohet se një nga emrat më të fuqishëm që po tenton të hyjë në treg është biznesmeni Besnik Sulaj, i njohur si “Beso i Tajvanit”. Ai ka në pronësi lokalin dhe kazinonë “Tajvani” në Parkun Rinia dhe ka ushtruar aktivitet me licencë kazinoje prej vitesh. Sot, ai po lobon të marrë disa nga licencat për baste online.
Për këtë qëllim është krijuar kompania “Novabet”, me objekt aktivitetin e basteve sportive online, import-eksportin e pajisjeve dhe çdo aktivitet tjetër të lidhur me këtë treg.
Aksionerët e saj janë të njëjtët me ata të kazinosë “Regency”, në pronësi me letra të Skënder Sulajt, babait të Besos.
Aksionerë janë gjithashtu “Gaming Invests” dhe “Taiwan Park Center TPC”, të përfaqësuar nga Skënder Sulaj, ndërsa Avni Braçaj figuron si aksioner te “Taiwani”.
Burime thonë se këto lëvizje janë bërë përpara ngritjes së komisionit që do të shpërndajë licencat dhe se Beso i Tajvanit dyshohet se ka marrë premtime për më shumë se një licencë. Tashmë mbetet për t’u parë se cilët do të jenë anëtarët e komisionit dhe kompanitë fituese, mes dyshimeve për lidhje të forta me politikën dhe krimin.
