Ernest Muçi duket se e ka të ardhmen të pasigurt te Besiktasi. Sipas raportimeve nga mediat turke, sulmuesi i Kombëtares nuk bën pjesë në planet e klubit për sezonin e ardhshëm dhe një rikthim te Legia e Varshavës është skenar gjithnjë e më i mundshëm.
Gjigandët e Stambollit janë të gatshëm ta lënë të lirë Muçin për shifrën e 6 milionë eurove, ndërsa në bisedime mund të përfshihet edhe kartoni i mesfushorit polak Maksymilian Ojdela, 20-vjeçarit që ka bërë dy paraqitje me kombëtaren polake.
Ojdela i cili luan për Legian, ka regjistruar 24 paraqitje në sezonin që sapo përfundoi duke dhënë një asist. Ai është një nga emrat më të pëlqyer nga stafi teknik i Besiktasit dhe mund të jetë çelësi i marrëveshjes.
Ernest Muçi ka pasur një sezon jo të keq me Besiktasin, ku zhvilloi 38 ndeshje duke shënuar 7 gola dhe dhënë 4 asiste. Konkurrenca e madhe dhe strategjia e re e klubit kanë bërë që ai të mos shihet më si pjesë kyçe e skuadrës.
Nëse rikthehet te Legia, kjo do të ishte një lëvizje e zgjuar për 23-vjeçarin, i cili në të kaluarën ka pasur një periudhë mjaft të suksesshme me klubin polak; duke regjistruar 81 ndeshje, 13 gola dhe paraqitje të rëndësishme në Evropë.
