Banka Evropiane për Rindërtim dhe Zhvillim (BERZH) ka aprovuar një kredi prej 30 milionë eurosh për Shqipërinë, e cila do të përdoret për ndërtimin dhe elektrifikimin e hekurudhës Durrës-Rrogozhinë. Kjo kredi do t’i ndihmojë kompanisë shtetërore hekurudhore, Hekurudha Shqiptare, për të përmirësuar infrastrukturën transportuese në vend.
Sipas njoftimit në faqen zyrtare të BERZH, ky projekt mbështetet gjithashtu nga një kredi e BEI e vlerësuar po ashtu në 30 milionë euro, si dhe 60 milionë euro grante investimi dhe asistencë teknike nga Bashkimi Evropian përmes Kornizës së Investimeve në Ballkanin Perëndimor, të cilat u nënshkruan në fillim të vitit.
Projekti përfshin rehabilitimin e rreth 34 kilometrave të hekurudhës, ndërtimin e infrastrukturës moderne dhe rikonstruksionin e stacioneve përgjatë linjës. Linja Durrës-Rrogozhinë ka një rëndësi strategjike, pasi do të shërbejë si një nyje kyçe për lidhjen e Shqipërisë me Maqedoninë e Veriut, duke përmirësuar kështu lidhjet transportuese të rajonit.
Ky është projekti i tretë madhor hekurudhor i mbështetur nga BERZH në Shqipëri, pas realizimeve të tjera si linjat Tirana-Durrës dhe Vorë-Hani i Hotit. Me këto investime, synohet të optimizohet transporti hekurudhor në vend dhe të përmirësohen kushtet e udhëtimit për qytetarët.
