TIRANË- Kreu i Partisë Demokratike, Sali Berisha ka zhvilluar një takim me deputetin dhe një nga drejtuesit e Forza Italia, Alessandro Battilocchio. Në takim morën pjesë gjithashtu dhe Dott. Amadeo Folgone, këshilltar pranë Komisionit hetimor parlamentar italian për sigurinë e qyteteve, nënkryetari i parlamentit, Agron Gjekmarkaj, Akil Kraja drejtori i kabinetetit te kryetarit te PD si dhe kryetari i Partisë Demokratike në Itali, Bardhok Doda. Berisha e ka cilësuar Battilocchion një mik të vyer i Partisë Demokratike i cili sipas tij ndjek në një mënyrë tejet aktive zhvillimet e Shqipërisë dhe demokracisë shqiptare.
Ai theksoi përmes një postimi në “Facebook” se gjatë takimit e ka falenderuar Battilocchion për mbështetjen e ofruar nga Forza Italia gjatë zgjedhjeve të fundit. Sipas tij Partia Demokratike nuk do të rreshtë së luftuari farsën zgjedhore të 11 majit. Berisha gjatë takimit i ka treguar Battilocchios për gjendjen e Shqipërisë teksa ai i ka theksuar se vendi nën drejtimin e kryeministri Edi Rama është kthyer në narko-shtet.
“Një narko-shtet i cili është ndërtuar mbi vjedhjen sistematike të zgjedhjeve siç ishte dhe rasti i fundit ku partia-shtet organizoi mbi 4.500 aktivitete zgjedhore brenda dhe jashtë shtetit. Mijëra aktivitete keto të mundësuara nga abuzimi me burimet publike, njësoj si me tenderat elektorale të cilën kapin vlerën e gjysëm miliardi eurosh. Cfarë të thuash për 29.000 ha e parcelave kanabis në vend të 200 që parashikonte ligji?
Rasti i kartelit të Troplinëve, është shembulli më domethënës i këtij kriminalizimi dhe sesi pavarësisht hetimeve Italiane, shteti shqiptar për arsye të pastra elektorale e kriminale, bëhet palë me krimin e organizuar ndërkombëtar.
Një sistem tjetërsimi kriminal i votës së lirë i cili mbështetet nga një administratë e marrë peng nga patronazhistë të shtrirë në çdo hallkë të institucioneve publike dhe që i kërkon çdo nëpunësi civil minimalisht 10 vota familjarësh. Ky presion synonte në veçanti diasporën siç u provua nga faktet e shumta që Partia Demokratika ka publikuar nga farsa e votës në Greqi e Itali në veçanti,”shkruan Berisha.
Kryedemokrati theksoi se Partia Demokratike do ta vijojë luftën e saj në çbërjen e farsës së 11 majit duke denoncuar me fakte dhe raporte të pakontestueshme çdo krim zgjedhor, të çdo niveli dhe të çdo individi të përfshirë në to.
